Библиотека / диакон Феодор. Послание ко всем православным об антихристе

Послание ко всем православным об антихристе

: [URL="http://txt.drevle.com/text/diakon_feodor-poslanie_vsem_pravoslavnym_ob_antihriste"]диакон Феодор. Послание ко всем православным об антихристе[/URL]

* Неключимый рабъ Пресвятыя и животворящія. нераздѣлимыя Троицы, Отца и Сына и Святаго Духа, единаго и истиннаго Бога, юзникъ по вѣрѣ, церкви Христовѣ, возлюбленнымъ святымъ братіямъ, сіонскимъ чадомъ, всѣмъ православнымъ христіаномъ афеторосійскаго рода, радоватися и утверждатися, вкупѣ же и здравствовати въ непорочнѣй вѣрѣ Спасителя нашего Господа Ісуса Христа, Сына Вожія, и воспитоватися и возрастати во святыхъ благочестивыхъ отеческихъ догматѣхъ кромѣ всякія еретическія скверны и порока.

* Да вопрашиваютъ насъ нѣцыи отъ васъ о словеси избраннаго сосуда Христова Павла Апостола, еже къ Солуняномъ глаголетъ, благовѣствуя, во второмъ посланіи вторыя главы, объ антихристѣ, сіе: Да никтоже васъ, рече, прелститъ ни по единому образу, яко аще не пріидетъ отступленiе прежде, и открыется человекъ греха, сын погибели, противникъ(2Фес. 2:3) и проч. И азъ отвѣщаю по дарованію Святаго Духа, елика дадемися. Тогда, при Апостолѣ, процвѣте Христова вѣра въ Селунѣ отъ сихъ проповѣдниковъ истинныхъ Христовыхъ, и діаволъ воздвигъ своихъ нѣ-кіихъ безчинниковъ и льстецевъ развратныхъ, якоже и здѣ окрестъ Костромы и Павлова Перевоза, о нихже глаголете многая, блядуще, лживая и нечестивая ученія діаволя, — гадко и слышати намъ. И тако они селуняне обхождаху братію и прельщаху, глаголюще, яко уже пришествію Христову второму наставшу, и слышащихъ ужасаху и смущаху, и Павла Апостола облыгающе тѣмъ, сказующе, яко отъ него слышаще, еще же и отъ Духа глаголюще сицевая слышати, яко Христосъ грядетъ уже на судъ. 0, сатанина духа прелести! Утро благочестія токмо нача свѣтати еще по вселеннѣй, a сатанинъ духъ сказуя слѣпымъ, глаголя: солнце уже на западѣ! Сіе увѣдавъ Апостолъ, отъ Рима посла къ ниыъ въ Селунь посланіе сіе, моля ихъ, глаголя, чтобы не внимали прелестникомъ, глаголющимъ, яко настоитъ уже день Христовъ. Отнюдь, рече, не будетъ пришествія Христова на судъ, дондеже проповѣсться благовѣстіе Христово по вселеннѣй всѣмъ языкомъ, и потомъ по временамъ будетъ, рече, отступленіе отъ вѣры во всѣхъ языцѣхъ, и потомъ открыется въ мірѣ человѣкъ беззаконія, еже есть противникъ, врагъ Богу, антихристъ, и быши ему, рече, во свое время, тайна убо уже дѣется беззаконія, сирѣчь Апостоли Христови сѣяху благочестіе no земли, а лживіи апостоли діаволи злочестіе свое, якоже бысть при нихъ Симонъ волхвъ, Филиппа діакона крестникъ Николай отступникъ, Киноисъ и прочіи. И до соборовъ тако все брася церковь Христова со враги, и между соборами и по соборѣхъ, и донынѣ Христова часть святое дѣло творитъ и дѣйствуетъ Христовымъ духомъ, а антихристова часть свое тайное беззаконіе дѣетъ въ мірѣ непріязненнымъ духомъ. Чада Божія есть, по Іоанну Богослову, и чада непріязненная. Ктому рече Павелъ: тайна уже деется беззаконія, точiю держай нынѣ, дондеже отъ среды будетъ. Сіе о Римской власти рече, въ Римѣ бо писа. И тогда явітся беззаконный, егоже Господь убіетъ духомъ устъ своихъ и упразднитъ явленіемъ пришествія своего: егоже есть пришествіе no действу сатанину во знаменияхъ и чудесехъ ложнихъ, и прочая(2Фес. 2:7-9). И священный Златоустъ и благоумный Ипполитъ согласно вѣщаютъ, яко римская держава и власть отъ антихриста разорится, и тамо быти ему во Іерусалимѣ, а не здѣ, — не смущайтеся, братіе! Іаковъ жидовинъ пишетъ въ своей книгѣ, яко по престатіи царства греческаго быти десяти рогомъ антихристовымъ, — десять царей вкупѣ будутъ со антихристомъ, роги цари суть. И паче Іакова Іоаннъ Богословъ во Откровеніи пишетъ ((Апокал. гл. 17)). Ангелъ толкова ему о блудницѣ, сѣдящей на звѣри красномъ, иже имать главъ 7 и роговъ 10. Тѣже десять роговъ. сирѣчь царей, соберутся, и прелюбодѣйцу возненавидятъ и разорятъ, и власть свою и силу дадутъ антихристу, и поклонятся ему вси купно со Іудой, и возвеличатъ его и великимъ царемъ нарекутъ себѣ, и во Іерусалимѣ престолъ ему велій устроятъ, идѣже прежде жидовскія цари были великія, и онъ царство ихъ обновитъ, и вознесется окаянный, и богомъ себя назоветъ, и ту великихъ свидѣтелей, Илію, и Еноха, и Іоанна Богослова убіетъ, идѣже Господь нашъ распятъ бысть((Апокал. гл. 11)). A о Богословѣ въ Книгѣ о вѣрѣ пишетъ, яко вкупѣ и Богословъ антихриста обличати будетъ со Иліею и Енохомъ. И Ипполитъ пишетъ въ словѣ своемъ о Богословѣ, яко быти ему съ нимиже.

* И самого еще антихриста нынѣ нѣсть, не видимъ и не слышімъ, — не ужасайтеся; предотечи же его быша мнози, и нынѣ есть, и по сихъ еще иніи будутъ до сына погибельнаго. И ждите того, егда станетъ римская власть разорятися: но обстоимъ будетъ Римъ вои отвсюду, и тогда разумѣйте, яко приближися запустеніе ему и антихристово царство пріиде. По Ипполиту и Златоусту, Божію и человѣческую власть содержитъ нынѣ папа римскій, сирѣчь обѣма начальствы владѣетъ, и духовнымъ и градскимъ; а не о Никонѣ здѣшнѣмъ то писаніе збысться, но о римскомъ папежи; а не антихристъ самъ Никонъ, но предотеча его ближнiй, и послѣдующіи ему предотечи суть.

* А еже no временамъ, отступленіе прежде пріидетъ, по Павлову глаголу къ селунянамъ; и о томъ числѣ звѣриномъ указуетъ, еже есть 666, и о семъ добрѣ протолковано въ Книгѣ о вѣрѣ печати московской. И богомъ того непщите, и о себѣ ничего не мудрствуйте. Горе мудрымъ о себѣ, писаніе сказуетъ. И вы того бойтеся, и не вся тщитеся собою испытовати, и продерзіемъ злѣ толковати недовѣдомыя и закрытыя тайныя глаголы Вожія. Егда пріидетъ коей вещи время, тогда ту тайну и открыетъ Христосъ и немудрымъ младенцамъ. Егда же не у время исполнися числу, тогда и премудрымъ и богословцемъ недовѣдомо бываетъ и закрыто Святымъ Духомъ: не вся бо вѣдятъ и святіи богословцы. Вся бо Богъ единъ вѣсть; a святымъ своимъ коемуждо даетъ явленіе Духа на пользу, кой сосудъ что можетъ понести и не разбитися и не розсыпатися. О ономъ числѣ звѣриномъ прежде многихъ лѣтъ и до перваго отступленія римскаго пиша святый Ипполитъ, славнѣйшій отецъ и пастырь поднебесный, егоже Златоустъ похваляетъ вельми въ словѣ о лжеучителѣхъ: гдѣ бо, рече, Ипполитъ сладкій и благоумный. И той рече о числѣ томъ: не бо рече, опасно свѣмъ сего писанія. И святый Андрей Неокессарійскій толковалъ Апокалипсисъ, и егда дойде до числа того, и рече: сіе бо время открыетъ. А егда тѣмъ тайнамъ пріиде время, тогда благовѣрнымъ познано бысть, и писанію предано; а въ гибнущихъ и нынѣ покровенно есть, въ нихже Богъ вѣка сего ослѣпи разумы невѣрныхъ, по Апостолу Павлу.

* A o трехъ царѣхъ, ихже убіетъ антихристъ по воцареніи своемъ, о нихъ пишетъ Ипполитъ мѣста сказуя, а лицъ не указа. И нывѣ въ васъ, братіе, толкуютъ нѣцыи о тѣхъ царѣхъ пестрообразно и отнюдь неподобно, да не реку и еретическо. Аще святый лицъ не указа прежде времени, а оніи всуе мятутся, и не дарованное имъ разумѣніе восхищаютъ, и мудрѣйши себя святыхъ показуютъ, а не вѣмы, кто есмы. И иже 17 главъ откровенія Богословля, седмоглавіе звѣря, толкуютъ о патріарсѣхъ московскихъ, и то толкованіе ихъ ложно есть и блазненно. Молимъ таковыхъ любовію Духа не мудрствовати паче, еже подобаетъ мудрствовати, но мудрствовати въ цѣломудріи, по Апостолу, якоже подастъ Богъ. Мы бо о себѣ, братіе, не хощемъ ничтоже вамъ предавати и уставляти, и неподобно толковати паче Богомъ проданныхъ намъ святыхъ и непорочныхъ догматъ древнихъ отеческихъ, за нихже сподоби насъ Христосъ пострадати до крови и знаменія на насъ явити дивная, о нихже не невѣсте. Непщую и не по нашему то достоинству есть, но васъ ради избранныхъ спасенія, да и вы отъ ложныхъ ересей не прельщени будете и, православія ризу на себѣ носяще и непорочну сохраньше, да не осуждени и не нази и не постыдни явитеся и со всѣми святыми станете на страшнѣмъ судѣ Христовѣ одесную Царя Славы, великаго Бога и Спаса нашего Ісуса Христа. И нѣсть мы новіи законоучители и новыхъ догматъ уставщики, но православныя вѣры защитники, и по законѣхъ святыхъ отецъ нашихъ поборницы. стоимъ и побораемъ за непорочный сѵмволъ вѣры, и за истинное сложеніе перстовъ во знаменіи крестномъ, и за трисвятую аллилуію, еже: аллилуіа, аллилуіа, слава тебѣ Боже, за Литургію старыхъ Служебниковъ, и за святое крещеніе по древнимъ книгамъ, въ нихже вездѣ есть Ісусъ, а Іисуса, раздѣленнаго имени, во всѣхъ книгахъ, что нынѣ есть въ Русской землѣ, отнюдь нѣсть, — извѣстно испытахъ о семъ вся книги отъ Владимірова крещенія, и за сія вся страждемъ о Христѣ Ісусѣ и умираемъ. Вѣмъ, яко вся свята суть и нескверна вышереченная мною. И за тричастный крестъ Христовъ подвизаемся, и двоесложнаго образа крестнаго не хулю и не отмѣтаю, — обоя въ церкви есть, и проображеніе и событіе самой истины, тридревнаго креста Христова. И вы о всѣхъ сихъ, возлюбленная братія и отцы, православныя христіане, мужіе и жены благочестивыя, подвизайтеся и умирайте: и съ первыми мученики нетлѣнныя вѣнцы пріимете отъ Христа. Бога, и безсмертную славу получите съ ними и вѣчную радость. А еже глаголите о Никонѣ, бывшемъ патріарсѣ, иже святую церковь разодра и разврати, и симъ расколомъ всю святорусскую землю возмути, рождьшася его отъ нечистыя дѣвки татарки, и сего ради мните его самого антихриста быти: ни, братіе, ни! Аще и тако суть рождься, о семъ извѣстно не всѣмъ и самъ азъ; но подобаетъ и о вразѣ правду свидѣтельствовати. Татарове не Данова племени суть, но отъ Агари суть пошли и отъ сына ея Измаила, егоже роди Авраамъ отъ сея Агари рабыни своея, и сего ради татарове словутъ агаряне и измаильтяне; а антихристъ будетъ отъ жидовскаго колѣна Данова, егоже роди Іаковъ-Израиль отъ Валлы Рахилины, и отъ сего колѣна Данова будетъ антихристъ, а не отъ татарскаго рода. И антихристъ будетъ царь, а не патріархъ. Испытовайте писанія съ великимъ опаствомъ и прочитайте съ разумомъ и со вниманіемъ прилежно, да не прельщени будете отъ лже-словесниковъ и бабьихъ басней. Велія бѣда отъ невѣденія святыхъ писаній раждается. Отъ сего и ереси всѣ, отъ сего и расколы церковныя, и мятежи и брани, и пагубы душевныя: не увѣдѣша бо ниже уразумѣша, во тьмѣ ходятъ. И мой отвѣтъ вопрошающимъ сей есть.

* А новыя книги нынѣ подобны онѣмъ, иже въ пустыни чуждъ огнь принесшимъ въ храмъ свидѣнія Господня, имже Бога прогнѣваша и погибоша за сіе: чуждій огнь огнь Господень не пріятъ, и принесшихъ погуби. Чтый да разумѣетъ.

* Да блюдитеся зѣло отъ ложныхъ мудрованій и своеумныхъ, и вся искушающе доброе держите. Отъ всякія злыя вещи огребайтеся, и пустыхъ распрей и сваровъ бѣгайте. Сими злыми діаволъ въ насъ любовь разоряетъ, еже есть начало и конецъ всякому благу: исполненіе бо закона любы есть. И молите о насъ, братіе, яко да избавимся отъ настоящаго сего вѣка лукаваго, видимъ лице ваше. Благодать Господа нашего Ісуса Христа со всѣми вами. Аминь.

* Источник: Субботин Н. И. Материалы для истории раскола. Ч.3. Т.6. 1881.